حوزہ نیوز ایجنسی کی رپورٹ کے مطابق، سپاہ پاسداران انقلاب اسلامی کے شعبۂ تعلقات عامہ نے اعلان کیا ہے کہ “وعدہ صادق 4” آپریشن کی 73ویں لہر میں جنوبی اور شمالی مقبوضہ فلسطینی علاقوں کو “یا حیدرؑ” کے نعرے کے ساتھ نشانہ بنایا گیا۔
بیان میں کہا گیا ہے کہ سپاہ کے فضائیہ ڈویژن نے میزائل اور ڈرون حملوں کے ذریعے اسرائیل کے جنوبی علاقوں میں واقع اہم فوجی اور سکیورٹی مراکز، جن میں عراد، دیمونا، ایلات، بئرالسبع اور کریات گت شامل ہیں، کو نشانہ بنایا۔ اس کے علاوہ خطے میں امریکی فوج کے علی السالم، المنہاد اور الظفرہ کے اڈوں پر بھی میزائلوں اور خودکش ڈرونز کے ذریعے حملے کیے گئے۔
سپاہ کے مطابق ان حملوں میں “فتاح”، “قدر” اور “عماد” میزائل سسٹمز استعمال کیے گئے اور اہداف کو “درست نشانہ” بنایا گیا۔ بیان میں دعویٰ کیا گیا ہے کہ ابتدائی اطلاعات کے مطابق ان حملوں کے نتیجے میں 200 سے زائد افراد ہلاک یا زخمی ہوئے ہیں۔
مزید کہا گیا ہے کہ اسرائیلی حکام کی جانب سے نقصانات اور جانی نقصان کی خبروں کو چھپانے کے لیے صحافیوں اور عینی شاہدین پر دباؤ ڈالا جا رہا ہے۔
بیان میں لبنان کی مزاحمتی تنظیم حزب اللہ کی کارروائیوں کو بھی سراہا گیا اور کہا گیا کہ اس نے شمالی محاذ پر دباؤ بڑھا کر ایک مؤثر محاذ قائم کیا ہے۔
سپاہ نے یہ بھی کہا کہ اسرائیلی عوام بالخصوص وہ لوگ جو فوجی اور جوہری تنصیبات کے قریب رہتے ہیں، موجودہ صورتحال سے شدید متاثر ہیں، جبکہ جنگی حالات تیزی سے تبدیل ہو رہے ہیں اور اسرائیلی دفاعی نظام کمزور پڑتا دکھائی دے رہا ہے۔
آپ کا تبصرہ